القائمة الرئيسية

الصفحات

تعديل المشاركة

كيف تصبح مهندس تصميم انشائي محترف؟؟!

Creative Engineer
(0)

؟كيف تصبح مهندس تصميم انشائي محترف؟؟! 

ًمهم جدا


كيف تصبح مهندس تصميم انشائي محترف

 مفهوم التصميم الانشائي!!!!!… … . 


السلام عليكم ورحمة الله وبركاته… … .اليوم اخواني واخواتي المهندسين والمهندسات اضع بين ايديكم موضوع مهم جدا لكل مهندس مدني حديث التخرج ويريد ان يكون علي دراية بمفاهيم مهمه في مجال العمل … .هذا الموضوع هو التصميم الانشائي !!!!!!!!!!!!!!!!. 

ساشرح لكم باللغه العامية وبدون اي تعقيدات مفهوم التصميم الانشائي وايه اللي مطلوب منك عشان تتعليم تصميم وتقدر تشتغل كمصمم انشائي… … 

دلوقتى إنت مهندس مدنى و عاوز تعمل ديزاين إنشائي لمبنى معين ( فيلا – عمارة – مستشفى – مدرسة – … .) 

إيه اللى مطلوب منك تتعلمه أو تعرفه علشان تعمل ده ؟ 

مطلوب منك علشان تعمل أى ديزاين إنشائي لأى مبنى حاجتين رئيسيتين و هما الConceptو الprograms 



Concept


نقصد بيها أساسيات الهندسة الإنشائية اللى إنت إتعلمتها فى الكلية أساسيات الكود اللى إنت بتعمل ديزاين بيه اللى يهمنا هنا أساسيات 3 مواد رئيسية و هى :-

تحليل المنشآت :

أنا بعتبر إن ال Structure analysis هى من أهم المواد اللى إنت درستها فى الكلية هى المفتاح الرئيسى للديزاين المادة بتهتم بدراسة تأثير الأحمال المختلفة على المنشأت و تحليل هذه الأحمال و إستخراج ردود الأفعال و القوة الداخلية المتولدة نتيجة تأثير الأحمال الخارجية و بناءً على هذا التحليل يتم التصميم 

أصلا لو إنت جبت المومنت و الشير صح خلاص بالنسبالنا الديزاين خلص الإستراكشر ( أ ب ) هندسة
هنا هتلاقى أحسن ورق تزاكر منه إستراكشر للمهندس أكرم مصطفى


تصميم المنشآت الخرسانية :

نيجى بقى للكبير الكبير أوى كمان أهم مادة على الإطلاق لو بتنقل شيتات إنقل شيتات كل المواد ماعادا شيت الخرسانة و لو الشيت فيه 10 مسائل حل مسئلة واحدة بس بإيديك أحسن مية مرة ما تنقل ال 10 كلهم.

غلط تماماً الإعتماد الكلى على البرامج فى نتائج التصميم و التحليل لازم المهندس يكون عنده sense بالأرقام و التسليح 

مادة الخرسانة تهتم بتصميم العناصر المختلفة للمبنى نتيجة للأحمال الواقعة عليها.

مادة الخرسانة بتعلمك إزاى تصمم الكمرات و الأعمدة و البلاطات و إزاى نطلع قيم التسليح و نرسم التسليح للعناصر دى و كل ده لازم المهندس يكون عارفه و عمله مانيول بإيده.

هنا هتلاقى أحدث ورق الكبير المهندس ياسر الليثى




وهنا هتلاقى ورق Tanks و زلازل وPrestressed 




ميكانيكا التربة و الأساسات :

للأسف طلبة كتير و بعض الدكاترة مش بيهتموا أوى بمادة الSoil و لا ال Foundation دايما بيكون تركيز الطالب على الإستراكشر و الخرسانة و بيهمل المواد التانية و ده خطأ كبير جداً. 

مادة ال سويل و الأساسات مادة مهمة جداً لا تقل أهميتها عن أى مادة تانية علشان هى اللى بتفهمك سلوك التربة اللى هتشيل المبنى بتاعك و لو فهمت التربة غلط يبقى المبنى هيتشال غلط لازم تراجع كويس أوى مادى ال سويل لازم تراجع على الSettlement و Consolidation و Bearing Capacity و Sheet Pile Wall.

الشق التانى لل Soil هو تصميم الأساسات زى القواعد المنفصلة و المشتركة و اللبشة و الخوازيق و سند جوانب الحفر و غيره.



programs


فى مجال التصميم الإنشائي اللى ميعرفش برامج بنعتبره أمى لا يجيد القراءة و الكتابة.
البرامج فى هذا الزمن تمثل حيز كبير جدا فى مجال التصميم الإنشائي كل شهرين تلاتة شركة جديدة تطلع برنامج جديد تنافس بيه الشركات و البرامج القديمة فلازم المهندس يكون عنده الحد الأدنى من المعرفة بهذه البرامج ثم يطور نفسه أولا بأول علشان يواكب التطور اللي بيحصل فى الكون.

لو قسمنا البرامج من حيث الإستخدام هنقسمها لثلاث أجزاء : –

  1. برامج Drawing
  2. برامج التحليل الانشائي
  3. برامج Calculation
فيه برامج كتير جدا خاصة بالإستيل و الطرق و الصحية و غيره مش هنتكلم عليهم كلامنا بالتفصيل هيكون بإذن الله عن برامج تصميم المنشأت الخرسانية.


أولا : برامج الDrawings :- 



1- AutoCAD :-      

  1. أهم برنامج على الإطلاق مينفعش أى مهندس نقول عليه مهندس غير لما يكون عارف كويس جدا برنامج ال AutoCAD.
  2. عيب أى مهندس سواء كان مهندس موقع أو مكتب فنى أو تصميم مبيعرفش يستخدم برنامج ال AutoCAD لا و مش بس كدة التنافس فى الأوتوكاد بين المهندسين مش بيكون فى معرفة البرنامج من عدمه لأ ده بيكون على سرعة إستخدام البرنامج .
  3. معرفتك فى إستخدام البرنامج ده شىء مفروغ منه أنا عاوزك تبقى عارف الأوامر الخفية فى الأوتوكاد اللى تخليك تنجز رسوماتك أو تنجز حصرك بسرعة.
  4. لو عملنا مشروع ما فى 100 ساعة هنلاقى إستخدامنا لبرنامج الأوتوكاد يمثل 80 ساعة و إستخدامة للخرسانة و الإستراكشر و السويل و الساب و السيف و الإيتابس و ….. يمثل 20 ساعة ( كل لما تبقى سريع أكتر كل لما تنجز عدد مشاريع أكتر و الزهر يلعب معاك أسرع ).
  5. البرنامج غنى عن التعريف البرنامج بيعمل أى رسمة إنت عاوزها سواء كانت معمارى أو إنشائي 
  6. ده أحسن شرح أوتوكاد للمهندس محمد فتحى https://www.youtube.com/watch…
  7. شرح المهندس محمود عبد الرازق  https://www.youtube.com/watch…
  8. و يفضل إنك تتعلم البرنامج ده بدرى يعنى بعد أولى مدنى أو بعد ثانية بالكتير

2- AutoCAD Structural Detailing :- 

  1. – أنا عارف إن فيه ناس كتير متعرفش حاجة عن البرنامج ده بس أنا بسميه الساحر
  2. – البرنامج يعتبر مع مجموعة برامج الرسم و هو خاص بإعداد الرسومات التنفيذية أو ال Shop Drawing البرنامج محترف جدا فى التعامل مع رسم الحديد و تفريده و حساب كمياته بدقه عالية و بسرعة خيالية بتديله بيانات الكمرة مثلا و بتكة زرار واحدة بيرسملك الكمرة بتسليحها السفلى و العلوى و الإضافيات و الكانات و التفريد و كمان يعملك جدول بالكميات 
  3. – كمان البرنامج بيعمل Modeling للمبنى بتاعك و من خلاله تقدر ترسم المبنى بتاعك 3d و تصدره لل Revit
  4. – برنامج ذكى جدا سريع جدا مفيد جدا لمهندسين المكتب الفنى 
  5. – للأسف الشرح اللى موجود على النت أى كلام خالص علشان كدة إن شاء الله قريبا هنعمل شرح Online للبرنامج 
  6. – و يفضل تتعلم البرنامج ده بعد التخرج لو هتشتغل مكتب فنى أو لو هتعمل Shop Drawing و حصر حديد 

3- Revit Structure :- 

  1. – برنامج الريفت فى الحقيقة من وجهة نظرى الشخصية التى لا قيمة لها على الإطلاق إنه برنامج واخد سيط كبير جدا أكثر مما يستحق البرنامج مفيد طبعا و بيعمل حاجات كويسة بس مش اللى هو ساحر و مش اللى هو هيحل محل ال AutoCAD يعنى. 
  2. – برنامج الريفت الميزة الرئيسية اللي فيه إنه يقدر يعمل للمبنى بتاعك موديل عن طريق إنك ترسم البلان بس و كمان البرنامج ضمن مجموعة برامج مرتبطة بتكنولوجيا ال BIM و دى بتربط برنامج الريفت المعمارى بالإنشائي بالإلكترميكانيكال و برامج تانية كتير بحيث لو حبينا نعمل أى تعديل سواء كان إنشائي أو غيره التعديل ده بيسمع فى المبنى ككل. 
  3. – تقدر تتعلم البرنامج من هنا https://www.youtube.com/watch…
  4. – و يفضل تتعلم البرنامج لو إنت حابب بعد التخرج و إجبارى تتعلمه لو حابب تسافر الخليج

ثانيا : برامج التحليل الإنشائي :- 

بعد لما بنحط الأعمدة و الكمرات و البلاطات بالأبعاد المبدئية بتاعتهم بناخد ال Statical System ده و نبدأ نحط عليه الأحمال و نحلله ( يعنى بطلع المومنت و النورمال و الشير و حاجات تانية كتير )

1- Sap2000 :-

  1. – برنامج الساب أشهر برنامج تحليل منشأت البرنامج من إنتاج شركة CSI البرنامج عام و شامل لازم أى مهندس تصميم يكون ملم بيه جدا يعتبر برنامج الأوتوكاد دراع المهندس اليمين و الساب دراعه الشمال
  2. – بيقدر يحلل أى عنصر فى المنشأ أو أى منشأ البرنامج بيحلل الكمرات و الأعمدة و البلاطات الSolid و الFlat و الHollow
  3. – يقدر يحل التغطيات و الصالات ال Frames و ال Arch Girdersو الArch Slab و ال Saw Tooth و غيرهم 
  4. – كمان بيعمل تحليل للمبنى على أحمال الزلازل و الرياح
  5. – بيقدر يعمل تحليل للحوائط الساندة و الأساسات المنفصلة و المشتركة و اللبشة 
  6. – بيقدر يعمل تحليل للتانكات ال Elevated و ال Under Ground و الRested
  7. – عن طريق ال DXF File بنقدر نسحب الرسمة من الأوتوكاد إلى برنامج ال Sap
  8. – تقدر تستمتع بشرح المهندس زغلل من هنا 
  9. – https://www.youtube.com/watch…
  10. – و يفضل تتعلم البرنامج بعد تانية مدنى 

2- Safe :-

  1. – شركة Csi عملت برنامج منفصل لتحليل و تصميم البلاطات و الأساسات سمته ال Safe
  2. – البرنامج أسرع و أسهل جدا من برنامج الساب البرنامج فاهم إن العنصر ده عمود و ده كمرة و دى بلاطة غير الساب 
  3. – البرنامج دقيق جدا فى تمثيل الأعمدة البرنامج يقدر يرسم العمود بقطاعه غير برنامج الساب اللى بيمثل العمود كنقطة أياً كان قطاعه 
  4. – البرنامج بيقدر يكون Stiff Area فوق رؤوس الأعمدة وبالتالى يقدر يطلع المومنت و الشير للبلاطات و الكمرات على وش العمود و هو ده الصح 
  5. – البرنامج بيقدر يرسم فى البلاطة بتاعتى شرائح و يطلعلى النتائج على كل شريحة كأنى بحل مانيول بالظبط 
  6. – البرنامج يقدر يعملى Drop Panel أو Column Head بكل سهولة 
  7. – البرنامج يقدر يرسم ال One Way Hollow Block و ال Two Way Hollow Block أسهل من و أدق من الساب مية مرة 
  8. – البرنامج يقدر يعمل Non-Linear Analysis و يقدر يعمل Check على الLong Term Deflection و ال Crack Width
  9. – البرنامج يقدر يعمل تصميم للبلاطة ويعمل كمانCheck Punching و يطلع الحديد و يرسمه كمان و يطلعلك لوحات و قطاعات و لكن التصميم بيكون بالكود الأمريكى أو الأوروبي أو البريطانى 
  10. – تقدر تتعلم البرنامج من الدكتور ثروت صقر 
  11. – https://www.youtube.com/watch?v=1YiRHMYxNIU
  12. – و يفضل البرنامج ده تتعلمه بعد لما تتقن الساب يعنى بعد ثالثة مدنى 

3- Etabs :-

  1. – لما نيجى نحلل الزلازل على برنامج الساب بنلاقى صعوبة جدا فى إدخال الأدوار المتكررة بيسبب بطئ كبير جدا للبرنامج و     كمان بنعانى جدا من إستخراج النتائج علشان كدة شركة csi عملى برنامج منفصل خالص عن برنامج الساب يكون متخصص فى   دراسة الأحمال الجانبية سمته الEtabs
  2. – ال Etabs بسهولة جدا بعد لما ندخل دور واحد بتكة زار بنكرر الدور ده 15 مرة من غير أى مشاكل أو بطئ 
  3. – ال Etabs يقدر يدخل أحمال الزلازل مانيول أو بإستخدام أى كود 
  4. – ال Etabs فاهم يعنى إيه Dynamic Analysis وP-delta Analysis و Response Spectrum Curve
  5. – ال Etabs بسهولة جدا يقدر يطلع النتائج على كل Shear Wall و الCores و بكل بساطة يطلع النتائج فى جداول علشان بعد كدة نصدرها لأى برنامج تصميم 
  6. – ال Etabs بسهولة يقدر يعمل Check على ال Story Drift و ال Story Displacement و الCenter Of mass and Center Of rigidity
  7. – و ممكن نحلل عليه على ال Vertical Loads عادى جدا و أسهل كتير من الساب
  8. – تقدر تتعلم البرنامج من هنا للدكتور ثروت صقر
  9. – https://www.youtube.com/watch?v=7bmWFLtpDv8
  10. – أو من أستاذنا السورى المهندس المحترم أحمد اللحام دورة Etabs قوية جدا جدا
  11. – https://www.youtube.com/watch…
مش هى دي بس برامج التحليل الإنشائي و لكن دول الأشهر فى مصر فيه برامج قوية جدا فى التحليل زى ال Robot و الStad Pro و ال Ansys و Autodesk advanced concrete

ثالثا : برامج ال Calculations : –

1- Csi Column :-

  1. – البرنامج من إنتاج شركة Csi برضه 
  2. – برنامج سهل جدا يستخدم فى تصميم الأعمدة و الحوائط الخرسانية المعرضه ل Normal + Moment
  3. – و عندنا عمود زاوية أو دائري أو عمود غير منتظم الشكل أقدر أصصمه بيه بكل سهولة 
  4. – هنا كل ما يخص برنامج ال csi Column
  5. – https://www.youtube.com/watch…
  6. – و يفضل تتعلم البرنامج بعد ثالثة مدنى

2- Sp Column :-

  1. – أثناء تشغيل برنامج ال Csi Column بيحصل حبة حاجات مستفزة زي إنه يهنج أو يقفل مرة واحدة و كان بيقابلنا مشكلة فى رسم التسليح و إدخاله فى البرنامج علشان كدة فيه شركة جديد ظهرت إسمها Structure Point و عملت برنامج لتصميم الأعمدة و الحوائط الخرسانية و سمته Sp Column
  2. – البرنامج زي ال csi Column بالظبط فى الوظيفة و لكنه أبسط و أسهل كتير جدا جدا 
  3. – أقدر أدخل الأحمال عليه بسهولة عن طريقtext File
  4. – أقدر أسحب عليه ال Core بتسليحه بسهولة من الأوتوكاد 
  5. – تقدر تتعلمه بسهولة من هنا https://www.youtube.com/watch?v=ddHz8Sc3fYY
  6. – و يفضل تتعلم البرنامج بعد ثالثة مدنى 

3- ال Excel :-

  1. – أهم برنامج هيفيدك فى الحياة العامة مش الهندسة بس 
  2. – البرنامج حلو جدا فى إعداد sheets الديزاين يعنى بنسجل عليه المعادلات أول مرة بس و بعدين أدخل المومنت يطلعلى التسليح و يقولى Safe و لاUnsafe و أقدر أصمم ألف كمرة و ألف عمود من غير نسبة خطأ ولا وقت يضيع 
  3. – مجموعة من ال Excel Sheets :-
  4. – https://drive.google.com/open…
  5. – أحسن حد تتعلم منه Excel أستاذنا أستاذ أحمد فاروق
  6. – https://www.youtube.com/watch…
هذا المقال منقول من صفحة المهندس هشام طارق علي موقع فيسبوك



أنت الان في اول موضوع
هل اعجبك الموضوع :

أخر المواضيع من قسم : الهندسه-الانشائيه

تعليقات

إرسال تعليق

الفهرس